Author: lensherra

Nýtt aðventuævintýri eftir Þorvald Þorsteinsson, Leitin að jólunum, með tónlist Árna Egilssonar verður frumsýnt í Þjóðleikhúsinu laugardaginn 26. nóvember nk. kl. 14:00. Jólasveinavísur Jóhannesar úr Kötlum fléttast inn í ævintýrið. Leikstjóri er Þórhallur Sigurðsson. Tveir skrýtnir og skemmtilegir náungar taka á móti litlum leikhúsgestum við aðalinngang Þjóðleikhússins. Með þeim í för eru tveir hljóðfæraleikarar og saman leiða þeir börnin með leik og söng um leikhúsið. Meðal viðkomustaða eru Kristalsalurinn, Leikhúsloftið og Leikhúskjallarinn, auk þess sem börnin fara um baksviðs í leikhúsinu. Börnin ferðast inn í ævintýraveröld jólanna og sjá leikþætti um jólin í gamla daga og í nútímanum. Þorvaldur Þorsteinsson starfar jöfnum höndum sem rithöfundur og myndlistarmaður. Hann hefur skrifað bækur fyrir börn og fullorðna, sem og fjölda leikverka fyrir svið, útvarp og sjónvarp. Hann samdi meðal annars hinar vinsælu barnabækur um Blíðfinn, og leikgerð eftir þeim var sett upp í Borgarleikhúsinu. Fjölskylduleikritið Skilaboðaskjóðan var sýnt í Þjóðleikhúsinu. Meðal annarra leikrita hans má nefna Við feðgarnir, Maríusögur og And Björk of course…., auk þess sem hann hefur skrifað og leikstýrt fjölda “vasaleikrita” bæði í útvarpi og sjónvarpi. Árni Egilsson er í fremstu röð íslenskra kontrabassaleikara og hefur leikið víða með sinfóníuhljómsveitum og spilað fjölda einleiksverka fyrir kontrabassa á Íslandi og víðar um Evrópu, sem og í Bandaríkjunum. Árni hefur búið í Los Angeles í Kaliforníu frá 1969 og er einn eftirsóttasti "stúdíó-bassaleikari" þeirrar borgar. Á seinni árum hefur Árni...

24. nóvember kl. 20:30 … Fimmtudaginn 24. nóvember kl. 20:30 frumsýnir Lýðveldisleikhúsið harmræna gleðileikinn Drauganet eftir Benóný Ægisson  í Tjarnarbíói. Verkið gerist í hugskoti höfundar sem er að reyna að skapa leikpersónur. Hann gerir ýmsar tilraunir á þeim og vekja þær sjaldnast mikla hrifningu leikpersónanna sem eru ofurseldar duttlungum höfundarins Leikarar í verkinu eru Aðalbjörg Þóra Árnadóttir, Benóný Ægisson, Brynja Valdís Gísladóttir, Gunnar Eyjólfsson, Höskuldur Sæmundsson, Ingibjörg Stefánsdóttir, Ingibjörg Þórisdóttir, Kolbrún Anna Björnsdóttir, Ólafur Guðmundsson, Páll Sigþór Pálsson, Valgeir Skagfjörð, Þórunn Clausen og Þröstur Guðbjartsson. Leikstjóri er Darren Foreman, sviðshreyfingar eru eftir Kolbrúnu Önnu Björnsdóttur en tónlist eftir Benóný Ægisson. Leikpersónur verksins þrá það heitast að komast í leikrit en eru svo óheppnar að hafa lent hjá duglausum höfundi. Hann á erfitt með að koma verkunum frá sér enda hefur hann ekki hugmynd um að persónurnar eiga sér sjálfstætt líf utan vitundar hans. Hann hefur því ekki grænan grun um hvaða óleik hann er að gera þeim. Birtingarform leikpersónanna eru neytandinn sem vinnur sig upp í að verða álitsgjafi, fyrrverandi feitlaginn dægurlagasöngvari, venjuleg stelpa sem vinnur í sjoppu, formaður mannanafnanefndar, systir Siggu systur sem var ógeðslega fullkomin, stórkarl sem á svo mikið undir sér að hann lendir í erfiðleikum ef hann dansar kvikkstepp, súludansmær sem spyr grundvallarspurninga um lífið og tilveruna, fótboltabulla sem ávarpar föður sem er að meilbonda með syninum á vellinum, fyrirsæta í tilvistarkreppu, sjómaður sem er...

Hugleikur frumsýnir í Tjarnarbíó Jólaævintýri Hugleiks, laugardaginn 19. nóvember kl. 20.00. Leikfélagið ræðst nú í það stórvirki að setja upp leikgerð af Jólaævintýri Dickens. Þetta er fyrsta íslenska leikgerðin á þessari sögu, sem hefur verið vinsælt viðangsefni leikhúsfólks frá því hún kom út árið 1843.  Söguna þekkja flestir, klassísk saga sem öll fjölskyldan getur notið saman, og er kjörin til að koma fólki í jólaskap. En að sjálfsögð láta Hugleikarar sér ekki nægja að fara einföldu leiðina að efninu, heldur flytja atburðna úr Lundúnaþoku nítjándu aldar inn í íslenskt sveitaumhverfi.  Hann Ebenezer gamli Skröggur er nú kominn inn í íslenska nítjándu aldar baðstofu, Tommi litli leikur sér að legg og skel og draugarnir þrír eru íslenskar skottur og mórar. Og þrátt fyrir dramatískan undirtón sögunnar er vörumerki Hugleiks að ærslast með efniviðinn og gera hann að sínum. Höfundar eru þau Sigríður Lára Sigurjónsdóttir, Sigrún Óskarsdóttir, Snæbjörn Ragnarsson og Þorgeir Tryggvason. Með hlutverk Ebenezers Skröggs fer Björn Thorarensen, en alls standa um tuttugu manns á sviðnu. Leikstjórn er í höndum höfunda. Sýningar fara fram í Tjarnarbíói og standa yfir fram í miðjan desember, auk tveggja sýninga milli jóla og nýjárs. Í sýningunni eru fjölmörg sönglög sem þegar hafa verið hljóðrituð og gefin út á geisladiski sem verður til sölu í miðasölu. Um undirleik sér hljómsveitin Forynjur og draugar, en þar eru m.a. innanborðs félagar úr hljómsveitunum Ampop, Hraun og Innvortis,...