Author: lensherra

Leikritið um Ronju Ræningjadóttur verður frumsýnt á Stóra sviði  Borgarleikhússins næstkomandi sunnudag, 12. febrúar.  Sagan um Ronju er eftir Astrid Lindgren og segir frá ræningjadótturinni sem býr með foreldrum sínum og ræningjahópi í Matthíasarskógi. Leikstjóri er Sigrún Edda Björnsdóttir, sem fór með hlutverk Ronju þegar leikritið var síðast sýnt í Borgarleikhúsinu, fyrir tólf árum síðan. Í skóginum kynnist Ronja Birki, syni annars ræningjaforingja og erkióvinar Matthíasar, og með þeim tekst djúp vinátta, sem fordæmd er af foreldrum þeirra. Saman flýja þau því að heiman, hafast við í Bjarnarhelli og glíma við rassálfa, grádverga, skógarnornir og aðrar furðuverur. Þetta er saga um vináttu og hugrekki en þó fyrst og fremst kærleika.   Arnbjörg Hlíf Valsdóttir leikur Ronju og Friðrik Friðriksson leikur vin hennar Birki Borkason. Foreldra Ronju, þau Matthías og Lovísu, leika Þórhallur Sigurðsson (Laddi) og Sóley Elíasdóttir. Eggert Þorleifsson leikur öldunginn Skalla-Pétur. Með önnur hlutverk fara: Björn Ingi Hilmarsson, Davíð Guðbrandsson, Ellert A. Ingimundarson, Gunnar Hansson, Halldór Gylfason, Hildigunnur Þráinsdóttir, Hinrik Þór Svavarsson, Kjartan Bjargmundsson, Oddur Bjarni Þorkelsson, Orri Huginn Ágústsson, Tryggvi Gunnarsson, Valur Freyr Einarsson og Þór Tulinius. Auk þeirra taka 10 börn þátt í sýningunni sem skipta með sér 5 hlutverkum, einnig koma við sögu fjöldinn allur af rassálfum, skógarnornum og öðrum furðuverum. Tónlist er fyrirferðamikil í leikritinu, og hún er eftir danska tónlistarmanninn Sebastian, en tónlistarstjóri er Karl Olgeirsson. Leikmynd og búninga hannar Sigurjón Jóhannsson og...

Í Þjóðleikhúsinu hófust æfingar nú í vikunni á leikritinu Átta konur eftir Robert Thomas. Leikstjóri er Edda Heiðrún Backman en verkið verður frumsýnt á Stóra sviðinu í lok mars. Fögur eiginkona, tvær ungar og óstýrilátar dætur, aðþrengd mágkona, gráðug tengdamamma, dularfull ráðskona og kynþokkafull þjónustustúlka. Húsbóndinn sjálfur liggur sofandi í rúmi sínu uppi á lofti. Eða hvað? Þegar sjö villtar konur eru samankomnar og sú áttunda bætist í hópinn getur allt gerst! Glæpsamlegur gamanleikur með söngvum og dansi! Þegar leikritið Átta konur eftir Robert Thomas (1927-1989) var frumflutt í París árið 1961 hlaut það leiklistarverðlaunin Prix du Quai des Orfèvres og var leikið við miklar vinsældir. Franski leikstjórinn François Ozon vann geysivinsæla kvikmyndagerð verksins árið 2002, þar sem margar af fremstu leikkonum Frakklands fóru á kostum. Meðal annarra frægra verka Roberts Thomas eru Piège pour un homme seul og La Perruche et le poulet, en hann var einkum þekktur fyrir það að tvinna saman með góðum árangri form sakamálaleikrita og léttra gamanleikja. Robert Thomas starfaði einnig sem leikari, kvikmyndaleikstjóri og leikhússtjóri. Sævar Sigurgeirsson aðlagar verkið íslenskum aðstæðum og semur söngtexta. Sævar hefur samið fjölda leikverka fyrir áhugaleikhópa, en einnig verk fyrir Hafnarfjarðarleikhúsið, Ríkisútvarpið og Leikfélag Akureyrar. Ásamt þeim Ármanni Guðmundssyni og Þorgeiri Tryggvasyni samdi hann handrit barnasýningar Þjóðleikhússins, Klaufar og kóngsdætur, sem frumsýnt var á síðasta leikári. Edda Heiðrún Backman hefur leikið fjölmörg hlutverk bæði á sviði og í...

Hugleikur verður með febrúarútgáfu sína af Þessu mánaðarlega í Þjóðleikhúskjallaranum miðvikudagskvöldið, 8. febrúar. Í þetta skiptið er dagskráin að mestu á þjóðlegum nótum, í tilefni þorrans, en þjóðararfurinn hefur reyndar lengi verið mikilvægt viðfangsefni félagsins, og skilgreiningin á því bísna víð. Að þessu sinni verða tveir leikþættir fluttir. Bið á þorra eftir Árna Hjartarson og Gegnumtrekkur eftir Unu Mikaelsdóttur og Sigríði Láru Sigurjónsdóttur. Nýstofnaður kór, söngsveitin Hjárómur mun frumflytja kórverkið Heilræði eftir Þorgeir Tryggvason við texta úr Hávamálum. Þá mun Árni Hjartarson flytja meistaraverk Einars Benediktssonar, Hvarf séra Odds frá Miklabæ, í leikrænum búningi með áhrifshljóðum. Síðast en ekki síst mun póst-húsvíska súpergrúppan Rip, Rap og Garfunkel skemmta gestum á sinn einstaka hátt. Eitthvað fyrir alla á þorrahlaðborði Hugleiks 8. febrúar. Dagskráin hefst kl. 21.00. Miðaverð er 1000 kr. Miðapantanir í síma 551 2525 og í pósti á...

Af óviðráðanlegum orsökum getur ekki orðið af sýningu leikstjórans og myndlistarmannsins Christophs Schlingensiefs, Ragnarökum 2010, í Þjóðleikhúsinu á Listahátíð í vor. Því hefur verið ákveðið að taka til sýningar nýjasta verk Harolds Pinters, Celebration. Undirbúningur fyrir Ragnarök 2010 hefur staðið í um hálft ár, en í síðustu viku tilkynnti Schlingensief leikhúsinu að af samvinnu gæti því miður ekki orðið,  þar sem hann kysi fremur að einbeita sér að verkefnum á sviði myndlistar að svo stöddu. Það er Þjóðleikhúsinu mikið ánægjuefni að geta tilkynnt áhorfendum sínum að í stað sýningar Schlingensiefs hefur verið ákveðið að setja á svið nýjasta leikrit Harolds Pinters, Nóbelsverðlaunahafa í bókmenntum árið 2005. Verkið heitir á frummálinu Celebration og hlaut þá umsögn gagnrýnenda þegar það var frumflutt í London að það væri fyndnasta og aðgengilegasta verk þessa frábæra leikskálds í langan...

Leiksýningin Fullkomið brúðkaup hefur notið fádæma vinsælda frá því hún var frumsýnd hjá Leikfélagi Akureyrar í lok október. Troðfullt hefur verið á allar sýningar og til að mæta eftirspurn hefur fjölda aukasýninga verið bætt við sem allar hafa selst upp jafn óðum. Nú á laugardag mun tíu þúsundasti gesturinn sjá sýninguna sem er orðin sú næst vinsælasta í sögu leikhússins. Einungis hafa fleiri séð My Fair Lady árið 1983 en hana sáu rúmlega 11.000 manns. Tíu þúsund gestir hafa streymt í Samkomuhúsið að sjá gamanleikritið Fullkomið brúðkaup síðan það var frumsýnt í lok október. Verkið hefur hlotið afar jákvæð viðbrögð áhorfenda og gagnrýnenda. Fullkomið brúðkaup er orðið næstvinsælasta sýning LA frá upphafi. Einungis hafa fleiri séð My Fair Lady árið 1983 en hana sáu rúmlega 11.000 manns. Það kemur því í ljós í febrúar hvort metið verði slegið. Sýningar á Fullkomnu brúðkaupi hafa allar verið troðfullar og sýnt hefur verið allt að fimm sýningum um helgi. Aukasýningum er bætt við eins og þurfa þykir. Þrátt fyrir gott gengi þá mun sýningum á Fullkomnu brúðkaupi ljúka þann 18. febrúar. En sem fyrr hefur verið bætt við aukasýningum til að mæta eftirspurn eftir miðum og því enn hægt að fá miða – en hver er að verða síðastur.  LA tók í fyrra upp nýtt sýningarfyrirkomulag. Þá er fyrirfram skilgreindur sýningartími fyrir hvert verk og svo er það sýnt þétt í þann...