Author: lensherra

Leiklistarskóla Bandalags íslenskra leikfélaga var slitið að Húsabakka í Svarfaðardal í tíunda sinn s.l. sunnudag. Þær skólastýrur Gunnhildur Sigurðardóttir og Sigríður Karlsdóttir létu af störfum við það tækifæri eftir að hafa stýrt skólanum öll þessi 10 ár.   Voru þær kvaddar og þeim þakkað frábært sjálfboðaliðastarf fyrir skólann, því víst er að án þeirra sívakandi umhyggju væri skólinn ekki það sem hann er í dag. Í lokahófinu á laugardagskvöldið voru þeim afhent gjafabréf upp á námskeið að eigin vali á næstu árum í skólanum. Dalvíkurbyggð hefur styrkt skólann frá upphafi og var Svanfríður Jónasdóttir, nýkjörin bæjarstjóri, gestur skólans í lokahófinu. Þar voru einnig rúmlega 20 af eldri nemendum skólans en nemendafjöldi frá upphafi er kominn yfir 500 manns.Skólann sóttu í þetta sinn 33 nemendur. 6 sóttu framhaldsnámskeið í leikstjórn hjá Sigrúnu Valbergsdóttur, en þetta var í áttunda sinn sem hún leiðbeindi leikstjóranemum skólans. 11 sóttu sérnámskeið í leiklist hjá Steinunni Knútsdóttur og 16 sóttu sérnámskeið í leiklist hjá Ágústu Skúladóttur. Útskrifuðust allir með sóma og fengu við skólaslit afhent viðurkenningarskjöl og merki skólans.Efri myndin sýnir þær Gunnhildi og Sirrý slíta skólanum í 10. sinn en sú neðri er af þeim ásamt öllum kennurum og nemendum...

Í ár eru liðin 50 ár frá því stjórnmálasamband var tekið upp á milli Japans og Íslands. Af því tilefni verða fjórar japanskar gestasýningar í Þjóðleikhúsinu, tvær í vor og tvær í haust. Fyrsta sýningin var danssýningin Genji í Kassanum en 25. júní er röðin komin að sýningu ACO Okinawa – Undir Sjöstjörnu sem sýnd verður á Stóra sviðinu.     ACO Okinawa (The Art Community Organization) flytur íslenskum áhorfendum menningararfleifð frá Okinawa í sýningu sem er innblásin af frumkvöðlum þeirra á sviði ferðalaga og viðskipta. ACO Okinawa er sviðlistahópur frá japönsku eyjunni Okinawa sem er betur þekkt sem eyja dansa og söngva. Hópurinn vinnur með einstakar og hrífandi menningarhefðir Okinawa sem eru undir áhrifum frá hafinu og hugmyndum frumbyggjanna, um að Okinawa sé "eyja sem opin er heiminum", sem enn eru haldnar í heiðri meðal eyjaskeggja. Á heimskortinu er Okinawa bara lítill punktur í Kyrrahafinu. Þessi litla eyja var þó eitt sinn sjálfstætt konungdæmi – Ryukyus konungdæmið. Okinawa blómstraði á þessum tíma og stundaði viðskipti við Japan, Kína, Kóreu og suðaustur-Asíu. Ryukyuan-menningin er friðsamleg og alþjóðleg og litast af áralöngum viðskiptum eyjarinnar við umheiminn sem og ferðalögum. Skv. hefðinni, eru dans og tónlist frá Ryukyuan, sem flutt er af hópi tónlistarmanna (jikata), leið til að tjá hugsanir og tilfinningar eyjarskeggja. Hljóðfærin í tónlist Okinawa eru af ýmsum uppruna. Þegar þeim er blandað saman verður til sérstakur stíll í tónlist...